حوزہ نیوز ایجنسی کی رپورٹ کے مطابق، پاپولیشن کونسل پاکستان کے زیرِ اہتمام میریٹ ہوٹل اسلام آباد میں ’’اسلامی تعلیمات کی روشنی میں خاندانی بہبود، بچوں میں وقفہ اور ماں و بچے کے حقوق کے بارے میں رہنمائی‘‘ کے عنوان سے ایک اہم مذاکرے کا انعقاد کیا گیا۔ جس میں مختلف مکاتبِ فکر کے علمائے کرام اور مشائخِ عظام نے شرکت کی۔
اس مذاکرے میں رکن اسلامی نظریاتی کونسل پاکستان اور چیئرمین امام خمینی ٹرسٹ سید افتخار حسین نقوی نے بطور مہمانِ خصوصی شرکت کی اور موضوع کے مختلف پہلوؤں پر اپنی آراء، تجاویز اور رہنمائی پیش کی۔
اس موقع پر اسلامی تعلیمات کی روشنی میں خاندانی بہبود، ماں اور بچوں کے حقوق، بچوں کی بہتر تربیت اور ان کی صحت و نشوونما کے لیے مناسب وقفے کی اہمیت پر تفصیلی تبادلۂ خیال کیا گیا۔
شرکاء نے اس امر پر گفتگو کی کہ خاندانی نظام کے استحکام، والدین کی ذمہ داریوں اور ماں و بچہ کے حقوق کے تحفظ کے لیے اسلامی تعلیمات سے رہنمائی حاصل کرنا ضروری ہے۔
قابل ذکر ہے کہ مذاکرے کا بنیادی مقصد خاندانی بہبود اور بچوں کی بہتر پرورش سے متعلق دینی رہنمائی کو اجاگر کرنا اور اس حوالے سے علمائے کرام و مشائخ کی آراء سے استفادہ کرنا تھا۔
آپ کا تبصرہ